ရွှေဝါရာင်သံဃာတော်များရဲ့ နှစ်သစ်ဆုတောင်း....

အရှင်ထာဝရ
မြန်မာနိုင်ငံလုံးဆိုင်ရာ သံဃာ့ကိုယ်စားလှယ် (အတွင်းရေးမှူး)

မြန်မာ ပြည်သူများနှင့် ကမ္ဘာသူကမ္ဘာသားအပေါင်းတို့အား နှစ်သစ် မင်္ဂလာမှာ သာယာဝပြောသော တိုင်းပြည်နှင့် ကမ္ဘာသူကမ္ဘာသားများဖြစ်ကြပါစေ့လို့ ဆုမွန်ကောင်းတောင်းရင်း နူတ်ခွန်းဆက်သအပ်ပါသည်။ နှစ်သစ် မင်္ဂလာမှာ လွန်ခဲ့ပြီးတဲ့ အမှား အမှန်တွေ ဘေးဖယ်ထားပြီး ရှေ့ဆက်ကြိုးစားဖို့ ပဲလိုပါတယ်။ နိုင်ငံနဲ့ သာသနာ တွဲသွားနိုင်မှ သားစဉ်မြေးဆက်အတွက် နိုင်ငံနဲ့ သာသနာ ကောင်းမွန်စွာ အမွှေအနှစ် ထားရစ်လို့သူတိုင်း ၂၀၀၇ခုနှစ်က ဆရာဒကာ ညီညွတ်ခဲ့သည့်အတိုင်း စုပေါင်းဆောင်ရွက်ကြဖို့ နှစ်သစ်မှာဆုတောင်းရင်း တိုက်တွန်းနိူးဆော်လိုက်ရပါသည်။

အရှင်ထာဝရ

ဦးဣဿရိယ
မြန်မာနိုင်ငံလုံးဆိုင်ရာ သံဃာ့တပ်ပေါင်းစု နိုင်ငံခြားရေးတာဝန်ခံ

အားလုံးမင်္ဂလာပါ ၂၀၁၀ နှစ်သစ်မင်္ဂလာရက်မြတ်မဟာသမယမှာ စိတ်သစ် လူသစ် အမြင်သစ် အတွေးသစ် အရာအားလုံးသစ်လွင်စွာဖြင့် ပျော်ရွှင်ချမ်းမြေ့နိုင်ကြပါစေလို့ ရှေးဦး ပဏာမ ဆုတောင်းမေတ္တာ ပို့သလိုက်ပါတယ်။ ပြီးဆုံးသွားတဲ့ ၂၀၀၉ မှာ တစ်ယောက်နှင့်တစ်ယောက် အညှိုးအာဃာတ တွေရှိခဲ့ရင် မေ့ပျောက်ပစ်ကြကာ တစ်ယောက်နှင့်တစ်ယောက်နားလည်ခွင့်လွှတ်မှု ဖေးမကူညီရိုင်းပင်းမှု ကျင်နာသနားညှာတာမှု မေတ္တာစေတနာတွေ အပြည့်ဖြင့်တစ်ယောက်နှင့်တစ်ယောက် အတူလက်တွဲကာ နိုင်ငံကောင်းကျိုး လောကကောင်းကျိုး တွေကို ဆထက်တန်ဖိုးတိုးကာ ဆောင်ရွက်နိုင်ကြပါစေလို့ ဆုတောင်း မေတ္တာပို့သလိုက်ပါတယ်။ မိမိတို့တစ်တွေဟာ အင်မတန်ရခဲတဲ့ အဖိုးမဖြတ်နိုင်တဲ့ မြင့်မြတ်တဲ့ဘ၀ကို ရထားကြတယ် ဆိုတာကိုမမေ့သင့်ပါဘူး။ မြင့်မြတ်တဲ့ဘ၀ကို ရထားကြတာမှန်ပေမဲ့ မြင့်မြတ်အောင် တန်ဖိုးရှိအောင် ကြိုးစားပြီးနေကြမှ မြင့်မြတ်တဲ့ဘ၀တန်ဘိုးရှိတဲ့ဘ၀ တွေဖြစ်ကြမှာပါ။ဒီလိုမဟုတ်ဘဲ ကြီးနိုင် ငယ်ညှင်း အနိုင်ကျင့်နှိပ်စက်ကာ ဘယ်သူသေသေ ငတေမာရင်ပြီးရောဆိုပြီး တစ်ကိုယ်ကောင်း စိတ်ဓါတ်မွေးကာထင်ရာဆိုင်း မယ်ဆိုရင်တော့ မိမိရလာတဲ့ဘ၀ဟာ နိုင်ရာစားဖြစ်တဲ့ တိရစ္ဆာန်တွေရဲ့ဘ၀နဲ့ဘာမှ ခြားမှာမဟုတ်ပါဘူး။ အမြီးမပါတာ တစ်ခုပဲ ထူးခြားတာပဲရှိမှာပါ။

ဒါကြောင့်ပြီးဆုံးသွားတဲ့ ၂၀၀၉ ကာလမှာ ငါဘာတွေလုပ်ခဲ့သလဲ၊ အဆိုးတွေလား အကောင်းတွေလား ကိုယ့်ကိုယ်ကို သေချာစွာ မညာတမ်းပြန်မေးကြပါ။ ကိုယ်ကိုယ်ကိုအဖြေထုတ်ပါ။ အဆိုးတွေကြီးပဲလုပ်ခဲ့မိတယ်ဆိုလဲ လက်မိုင်ချပြီးငိုမနေပါနဲ့၊ ပြီးခဲ့တာတွေကသူဘာသာသူ အလကားသက်သက် ကောင်းလာမှာမဟုတ်ပါဘူး။ မိမိရဲ့အမှားတွေကို သင်ခန်းစာယူပြီး ဒီလိုအမှားမျိုး ထပ်မမှားအောင် ဂရုစိုက်ထိမ်းသိမ်းးကာ အခု၂၀၁၀မှာ စိတ်သစ်လူသစ်အာရုံသစ်တွေဖြင့် ကိုယ့်နိုင်ငံကောင်းကျိုးကို သယ်ပိုးထမ်းရွက်မယ်ဆိုရင် သင်ဟာမြင့်မြတ်တဲ့တန်ဖိုးရှိလူဖြစ်နိုင်ပါတယ်။ မြင့်မြတ်တဲ့တန်ဖိုးရှိတဲ့ လူတစ်ယောက်ဖြစ်အောင် ကြိုးစားဆောင်ရွက်နိုင်ကြပါစေ။။

မေတ္တာဖြင့်..မင်းသုည