ဒီမိုဝေယံ သို့ ပေးပို့သော တိုင်ကြားစာများ သတင်းများ ကို microsoft word ဖိုင်များဖြင့် ပေးပို့ပေးပါရန် လေးစားစွာတောင်းပန်အပ်ပါသည်။ ပေးပို့လာသော စာများကို အချိန်မှီဖော်ပြပေးနိုင်ရန်ကြိုးစားပါမည်။

လူလိမ်ကြီးများ…

အခုတလော အသံဗလံတွေ ဆူညံနေတယ်။ ကုလားလိုလို ဘာလိုလို ဘုန်းကြီးတစ်ပါးက အဆိပ်ထုပ် စိတ်ဓာတ်မြှင့်တင်ရေးဆိုပြီး သင်တန်းပေးတယ်။ အဲဒီဗီဒီယိုခွေက အင်တာနက်လောကမှာ ပေါ်လာခဲ့တာကိုး။ အရှင် အဲဒါဘယ်လိုလဲ နားမလည်နိုင်ဘူး..တဲ့.. မေးသူတွေကလဲ များသား။ မေးလဲ မေးလောက်ပါရဲ့… သင်တန်းပြသူရော သင်တန်းတက်သူတွေရော ဘာတွေလဲတော့ မသိ။ တစ်စုံတစ်ယောက်ရဲ့ တွန်းအားတွေနဲ့များ သာသနာညိုးနွမ်းအောင် ဖန်တီးနေသလားလို့ တွေးမိတယ်။

သေချာတာကတော့ သင်တန်းပြသူဟာ ဘုရားစကားကို နားမထောင်တဲ့သူလို့ သတ်မှတ်နိုင်ပါတယ်။ ဘုန်းကြီးအစစ် ဟုတ်ချင်လဲ ဟုတ်မယ်။ ဟုတ်ချင်မှလဲ ဟုတ်မယ်။ လောကကြီးကလဲ အရှုပ်တွေက တယ်ပေါသကိုး။ ကိုယ့်အတွက် ဆိုတဲ့ စာတန်းရဲ့အောက်မှာ မကောင်းမှုမှန်သမျှ အကုန်လုပ်နေကြပြီပဲ။

မြတ်စွာဘုရားရှင်ရဲ့ သာသနာမှာနေတဲ့ သံဃာတစ်ပါးဟာ ဘုရားစကားကို အတတ်နိုဆုံး ဥာဏ်မှီသလောက် နားထောင်ခဲ့ကြတယ်. နားထောင်နေကြတယ်။ နားထောင်ကြလိမ့်အုံးမယ်။ ကိုယ့်သဘောနဲ့ကိုယ် ဘာမှမလုပ်ဘူး.. ဘုရားမျက်နှာ သံဃာမျက်နှာကိုကြည့်တယ်.. ဘယ်သူ့မျက်နှာမှ မကြည့်ဘူးဆိုရင် အဲဒါ သံဃာ ရဟန်းလို့ ပြောဖို့ခက်ပါတယ်။

ရဟန်းမှန်ရင် သံဃာမှန်ရင် ဘုရားစကားကို လိုက်နာချင်ချင် မနာချင်ချင် အားနားပါးနားတော့ လိုက်နာကြရတာ ဓမ္မတာပဲ။ အခုတော့ ဘုရားရှင်ရဲ့ လမ်းညွှန်ချက်မှာမပါတဲ့ ပုံစံတွေ ပို့ချချက်အသစ်တွေ ထွင်တရားတွေကို သင်တန်းပေးနေတာဆိုတော့ ဒီသင်တန်းပြသူ(အကျွန်ုပ်ကဘုန်းကြီးဟု မသုံးလို)ဟာ ဘုရားကိုစော်ကားတယ် မျက်နှာပြောင်တိုက်တာပဲ။

ကိုယ့်စိတ်ကူးထဲက တရားကိုပြနေ သင်တန်းပေးနေတယ်ဆိုတော့ ဘုရားတရားမဟုတ်ဘူးပေါ့။ ပိဋကတ်သုံးပုံ နိကာယ်ငါးရပ်က လွတ်တဲ့တရားလို့ ပြောရမယ်။ ဘုရားသားတော်တွေကတော့ ဘုရားတရားတော်ကိုပဲ ဖြန့်ဝေကြတာပါ။ ဒီနေရာမှာ သတိထားဖို့ ကောင်းတာက ဒေ၀ဒတ်လောင်းလို အရေခြုံတွေလဲ ရှိတတ်တာကို သတိပြုရပါမယ်. သင်္ကန်းဝတ်ထားတိုင်း ဘုန်းကြိးလို့တော့ ပြောလို့မဖြစ်နိုင်ပါဘူး။

ဘာလုပ်ရင်ကောင်းမလဲဆိုတော့ နိုင်ငံတော် သံဃမဟာနာယကကိုလဲ တင်ပြရမယ်(အရေးယူတာ မယူတာ အသာထား)ပေါ့။ ဗုဒ္ဓဘာသာဝင်တွေ ကိုယ်တိုင်ကလဲ ဒီသင်တန်းပြသူကို ဆန့်ကျင်ရမယ်။ သံဃာတွေ စုပေါင်းပြီး ဒီကိုယ်တော်ကို ဆန့်ကျင်ကြရမယ်။ လောလောဆယ် လုပ်နိုင်တဲ့နည်းလမ်းတွေပါပဲ။ ဒီထက်ပိုကောင်းတွေ နည်းလမ်းတွေကိုလဲ ၀ိုင်းပြီး စဉ်းစားကြရအုံးမယ်။

စိတ်မပျက်နဲ့ ဘာသာဝင်အပေါင်းတို့ !! ဗုဒ္ဓဘာသာမှာ ဒီလိုတွေ မကြာခဏကြုံခဲ့ရဖူးတယ်။ ကိုယ်တိုင်တီထွင် ယူဆထားတဲ့ အယူအဆ အသစ်တွေသွတ်သွင်းမှုတွေနဲ့ မကြာခဏ လုပ်ကြံခံနေရတယ်။ မြန်မာမှာ ထင်ရှားတဲ့ ကျောက်သင်္ဘော၊ ကြောင်ပန်း၊ မိုးပြာဂိုဏ်းနဲ့ နောက်ဆုံးပေါ်နေတဲ့ ခေတ်သစ် ပညတ်သမားကြီးများ၊ သူတို့ရဲ့ တပည့်လက်ဝေခံများ။ သာသနာပြုဆိုတဲ့ စကားလုံးကိုသုံးပြီး သာသနာကို အတွင်းကျကျ ဖျက်ဆီးနေသူများ..စတဲ့ စတဲ့ သာသနာဆူးညှေင့်တွေ များနေတယ်။ သာသနာကိုချစ်တဲ့ ဘုရားကိုယုံတဲ့ တရားကိုလေးစားတဲ့ သံဃာတော်များက ဒါတွေကို အတတ်နိုင်ဆုံး ကာကွယ်သွားကြပါမယ်။

လူလိမ်ကြီးများ http://www.yawcommunity.com/2011/01/blog-post.html
နှင့် ပတ်သက်၍

ဒီကိစ္စကို နှစ်မျိုးခေါင်းစဉ်ခွဲ စဉ်းစားကြည့်ချင်ပါတယ်။

တစ်ပိုင်းက စိတ်ဓာတ်မြှင့်တင်ရေးသင်တန်း အနေနှင့်စဉ်းစားမယ်ဆိုရင် ဒါမျိုးကတော့ ကမ္ဘာပေါ်က တိုင်းပြည်တော်တော်များများမှာ လုပ်နေကြတဲ့ ခေတ်စားနေတဲ့ သင်တန်းမျိုးတွေဖြစ်လို့မို့ အထွေအထူး ဝေဖန်ဖို့မရှိပါဘူး။ ဒီလိုသင်တန်းမျိုးကို ကြိုက်တဲ့သူတွေရှိသလို၊ မကြိုက်တဲ့သူတွေလည်း ရှိပါတယ်။ သင်တန်းတွေအနေနှင့် အောင်မြင်မှု ဘယ်လောက်အတိုင်းအတာအထိရနေတယ်၊ အောင်မြင်မှုကို ဘာစံနှင့်သတ်မှတ်တယ်ဆိုတာတွေကိုတော့ မသိနိုင်ဘူးပေါ့လေ။ ကျိန်းသေတာတော့ သင်တန်းဖွင့်စားတဲ့သူတွေတော့ အဆင်ပြေနေကြပါတယ်။

နောက်တစ်ပိုင်းအနေနှင့်ကတော့ အခုကိစ္စမှာ သင်တန်းကို ဦးစီးတဲ့သူက သံဃာတော်တစ်ပါး ဖြစ်နေတဲ့ပြဿနာပါ။ သံဃာဖြစ်တာလည်း ကိစ္စမရှိသေးဘူး။ အခုမှာ သူ့ ရဲ့  ပြောပုံဆိုပုံ၊ လုပ်ပုံတွေက သံဃာတော်တစ်ပါး ပြုသင့်ပြုအပ်၊ ပြောသင့်ပြောအပ်တာမျိုးမဟုတ်ပဲ သာသနာတော်နှင့် ဆန့်ကျင်ဘက်ဖြစ်နေတာပါ။ အမှန်က ဒီလိုသင်တန်းမျိုးကို မြတ်စွာဘုရားရဲ့ လောကီကြီးပွားကြောင်း တရားများနှင့် တွဲဖက်ပြီး သင်တန်းပေးနိုင်ခဲ့မယ်ဆိုရင် အတော် အားရကြည်နူးစရာကောင်းမယ့်အဖြစ်ပါ။ အခုတော့ ရွှေဘောင်ကွပ်လို့ရတဲ့နေရာမှာ မစင်နှင့်လူးလိုက်သလိုဘဲ ခံစားရပါတယ်။

အမှန်ကတော့ ဒီကိုယ်တော်ဟာ သူကိုယ်တိုင် သိက္ခာသုံးပါးအခံဓာတ်မကောင်းခဲ့လို့ အခြားတပါးကအယူအဆရဲ့  Brain Wash လုပ်ခြင်းကို ခံထားရတဲ့သူတစ်ဦးအဖြစ် ယူဆမိပါတယ်။ ဒါကို သူကိုယ်တိုင်သတိမမူမိဘဲ တခြားလူတွေကိုပါ သူနှင့်အတူ ရောပြီး လမ်းလွှဲကို ဦးဆောင်မှုပေးနေတယ်လို့ ယူဆမိတဲ့အတွက် အခု ဖြစ်စဉ်ကို တတ်သိနားလည်ကျွမ်းကျင်ကြသော ဆရာတော်များ၊ ပညာရှင်များ၊ မိမိတိုင်းပြည်အတွက် အကျိုးကို မျှော်ကိုးလုပ်ဆောင်နေသူများအားလုံးမှ ၀ိုင်းဝန်းကူညီ ဖြေရှင်းဆောင်ရွက်သွားကြဖို့ အနူးအညွတ် မေတ္တာရပ်ခံ ပန်ကြားလိုက်ရပါတယ်။

မေတ္တာဖြင့်
ဝိမုတ္တိသုခ
တိုကျို၊ ဂျပန်

Subscribe to: Post Comments (Atom)