မြန်မာပြည်ကလာတဲ့စာ.....

မြန်မာပြည်က ပြည်သူတစ်ယောက်က ပေးပို့လာတဲ့စာကို ဖော်ပြလိုက်ပါတယ်။

အကိုရေ လက်ရှိ မြန်မာပြည်အခြေအနေ ကတော့ အဓမ္မဝါဒီတွေက လွှမ်းမိုးနေပါပြီ။ ရပ်ကွက်ထဲမှာက အစစအရာရာ ကြံ့ဖွတ်တွေက ထိန်းချုပ်နေပြီလေ .. အခွင့်အရေး နည်းနည်းပါးပါးပေးတာနဲ့ အလုပ်မရှိ အကိုင်မရှိ ယုံကြည်ချက် ခိုင်ခိုင်မာမာမရှိတဲ့ ၁၀၉/၁၁၀ တွေက ကြံ့ဖွတ်ထဲ ပြေးဝင်ကြတယ်လေ။ ၂၀၀၇ သံဃာ့အရေးအခင်းတုန်းကဆို သတင်းပေးတွေက အပြည့်ပေါ့ ... အဲ့တုန်းက ရပ်ကွက်ထဲက အသိတစ်ယောက်ဆို မကျေနပ်လို့ ထွက်ပြီးဆဲတာ ဆဲတဲ့သူကို စစ်တပ်က သိတောင်မသိပေမယ့်.. နာရီပိုင်းအတွင်းမှာ လာဖမ်းသွားတယ်လေ။ Informer တွေကအပြည့်လေ... အကိုတုိ့ ၈၈နောက်ပိုင်းနဲ့ တော်တော်လေးကွာသွားပြီ....။

သံဃာ့အရေးခင်းတုန်းက ရပ်ကွက်ထဲက ကြံ့ဖွတ်အတွင်းရေးမှုးတစ်ယောက် ကသံဃာ့တစ်ပါးကို ရိုက်လိုက်တယ်လေ.. အဲ့သံဃာ့ ပုံလျှက်သားလဲကျသွားပြီး ဒီကောင်တွေက ဖမ်းခေါ်သွားတယ်လေ..။ ညကျတော့ သံဃာအပါး(၆၀)လောက်နဲ့ ရပ်ကွက်ကလူတွေက ရိုက်မယ်၊ဘာညာဆိုပြီး အိမ်ကိုဝိုင်းမယ် လုပ်တော့ စစ်ကား(၂)စီးက ကြိုရောက်နေပြီး အကာအကွယ် ပေးထားတယ်လေ။ အဲ့ကြံ့ဖွတ်အတွင်းရေးမှုး သံဃာ့အရေးအခင်း ပြီးတော့ ရပ်ကွက်ထဲ ပြန်ရောက်လာပြီး Hand Phone တလုံးနဲ့ ထောင်ထောင်နဲ့ပေါ့ ... တခြားနေရာတော့ မသိ ကျတော်တို့ တောင်ဥက္ကလာ၊ မြောက်ဥက္ကလာမှာ ဆိုတော်တော်ဆိုးတယ်။ BBCတို့ VOA တို့ နည်းနည်းအသံကျယ်ကျယ် ဖွင့်ရင်တောင် ကြံ့ဖွတ်တို့ စွမ်းအားရှင်တို့ ကကွက်ကြည့်ကွက်ကြည့်နဲ့ ပေါ့ သတင်းပေးချင် ကြတယ်လေ။ ၂၀၀၈ ဖွဲ့စည်းပုံတုန်းက ပိုဆိုးတယ်။ ရပ်ကွက်ထဲမှာ အစမ်းမဲပေးမယ် ဆိုပြီး ရပ်ကွက်ကလူတွေခေါ်ပြီး မဲပေးခိုင်းတယ်လေ။ ရပ်ကွက်ရုံးမှာ ကြံ့ဖွတ်တို့၊ ရဲတို့ထောက်လှမ်းရေးတို့က ကြည့်နေကြတာ။ ဘယ်သူမှ ကန့်ကွက်မဲ မပေးရဲကြတော့ဘူး အဲ့ဒီအစမ်းမဲတွေကို သူတို့က အတည်ယူလိုက်တာလေ။ နောက်သူတို့ ကြံ့ဖွတ်တွေကို သတင်းလွှင့်ခိုင်းတယ်လေ။ ကန့်ကွက်မဲပေးရင် ဖမ်းမယ်တို့ဘာတို့ ညာတို့ပေါ့။ အခုလည်းရွေးကောက်ပွဲကို ဒီပုံစံပဲချိုးမှာပဲ.. ယုံပြီးဝင်တဲ့သူကတော့ အကွဲပဲ...။

အခုရပ်ကွက်ကရုံးတွေမှာ ရဲကင်းပါတွဲဖွင့်ထားတယ်လေ... ရပ်ကွက်ထဲမှာ ဘယ်သူဘာလုပ်တယ်ဆိုတာ အကုန်သိတယ်။ နိုင်ငံရေး မလုပ်ရင် ပြီးရော လောင်းကစား အကုန်ဖွင့်ပေးထားတယ်။ ရပ်ကွက်ထဲမှာ ၂လုံးထီနဲ့ ကင်းတဲ့လူမရှိဘူး လူတွေကို တမင်ဖျက်ဆီးထာတာ. ဘာမှမဟုတ်တဲ့ကောင်တွေ ကြီးဆိုးနေတာပေါ့..။ ကျွန်တော်တို့ မြန်မာပြည်မှာ အဓမ္မဝါဒီတွေ ကြီးစိုးကုန်ပြီ။ နိုင်ငံရေးမှုနဲ့ ဖမ်းခံရတဲ့သူတွေမှာ နိုင်ငံတကာသိတဲ့ သူတွေပဲ သူတို့လက်စမဖျောက်ရဲတာ နာမည်မရှိတဲ့သူတွေ တခြားသူတွေဆို အစပျောက်သွားတာပဲ...။ ကျွန်တော့သူငယ်ချင်းတစ်ယောက်ဆို အခုထိ စုံစမ်းလို့ကို မရတော့ဘူး ရွှေဝါရောင်တော်လှန်ရေး အပြီးမှာလာဖမ်းသွားတာ... သူ့အမေဆို တငိုငိုတရီရီပေါ့ ... ဘယ်မှာမှ စုံစမ်းလို့မရဘူး... ဗေဒင်မေး၊ ဘာမေးနဲ့ အင်းစိန်မှာလိုလို နယ်မှာလိုလိုနဲ့ အစပျောက်သွားတယ်။ ကျွန်တော့ အဖေဆုံးတော့ အိမ်က နာရေးကြော်ငြာသွားထည့်တာ အကိုနာမည်မှာ ခေတ္တဂျပန်ဆိုတော့ သတင်းစာတိုက် ကမေးပါတယ်။ ဂျပန်ဘာသွားလုပ်တာလဲ ဘာဗီဇာနဲ့နေတာလည်းတဲ့။ အလည်သွားတာဆိုတော့ ဗီဇာစာရွက် ကော်ပီတောင်းလို့ တစ်စောင်ပေးလိုက်ရတယ်။ နာရေးကြော်ငြာထည့်တာတောင် မလွယ်တော့ဘူး။ ဂျပန်က နိုင်ငံရေးအရမ်းတက်ကြွှတော့ ဒီကောင်တွေ အရမ်းစိတ်ဝင်စားတယ်လေ။

ကျွန်တော့ သူငယ်ချင်းတစ်ယောက်က ကျောင်းသားခေါင်းဆောင် ကိုကိုကြီး အိမ်နားမှာနေတာလေ။ ကိုကိုကြီး အဖမ်းမခံရခင်တုန်းက ထောက်လှမ်ရေးတွေက အိမ်နားမှာ အပြည့်ပဲ.. ကိုကိုကြီးဘယ်သွားသွား လိုက်တာ. နောက်ဆုံး အမှိုက်သွားပြစ်တာတောင်လိုက်တယ်။ ဒါတောင်ဒီကောင်တွေ ကိုဇာဂနာရုပ်ဖျက်ပြီး ကိုကိုကြီးကိုလာတွေ့တာ မသိလိုက်ဘူး.....။ ကိုကိုကြီးကိုဖမ်းတော့ ကိုကိုကြီးမွေးထားတဲ့ အင်းခွေးကြီးတောင် ဖမ်းသွားတာ။ ခွေးကခေါ်မရလို့ ဒီကောင်တွေတော်တော် ကြိုးစားလိုက်ရတယ်။ ဘေးအိမ်က လူတွေထွက်ကြည့်တော့ ဒီကောင်တွေ တံခါးတွေ ပိတ်ခိုင်းတယ်လေ။ မြန်မာပြည်မှာ ဘယ်သူမှ လွတ်လွတ်လပ်လပ် မနေရပါဘူး။ Informer တွေက အပြည့် အရိုးအရင်းလေးကိုက်ပြီး လူပါးဝနေကြတာ။ ပြည်သူတွေကလည်း မကြိုက်ပေမယ့် ငြိမ်ခံနေရတယ်။ ဒါတောင် ကျတော်တို့ နေတာရန်ကုန် တောင်ဥက္ကလာ၊ မြောက်ဥက္ကလာနော်.. နယ်တွေမှာဆို စဉ်းစားသာကြည့်။

အခု၂၀၁၀ ရွေးကောက်ပွဲ ကတော့ ဒီကောင်တွေပဲ ရအောင်လုပ်သွားမှာပဲ... ၂၀၀၈လိုမျိူး... ဒီကောင်တွေ ၂၀၁၅ အထိ သန်းရွှေက စီမံကိန်းချထားပြီးသား...။ NLD ရွေးကောက်ပွဲ မဝင်တာကို တော်တော်များများ သဘောတူကြတယ်။ အားလုံးကစိတ်ဓာတ်ရှိတယ်... အကြောက်တရားက လွှမ်းမိုးနေလို့လေ... မကြောက်လို့လဲမရ စားဝတ်နေရေးလည်း ရှိသေးတာကိုး... ဒီတခါလူထုအုံကြွမှု ဖြစ်ရင်တော့ အနုနည်းနဲ့တော့ မရတော့ဘူးအကိုရေ.. အကြမ်းနည်း မပါရင်မရဘူး သူသေကိုယ်သေ ဆော်မှရမယ်။ မဟုတ်ရင် ထပ်အဖြိုခွဲခံရတာနဲ့ ပြီးသွားလိမ့်မယ်...။ ရပ်ကွက်တွေထဲမှာ Informer တွေ ကြံ့ဖွတ်တွေ စာရင်းကို ပြုစုထားမှရမယ်။ ဒီကောင်တွေ နောင်ကျဉ်အောင် အရင်လုပ်ထားမှ ရမှာ... ပွဲမပြတ်ရင်တော့ နောက်အနှစ် ၁၀၀ အထိခံရမယ် အကိုရေ.. အနုနည်းကော အကြမ်းနည်းကော သုံးမှရမယ်။ တကယ်လုပ်မယ့် သူတွေလည်းအသင့်ပဲ .စစ်အစိုးရကို မကြိုက်တာရော.. နောက် ကြံဖွတ်၊စွမ်းအားရှင်တွေကို ခေါင်းငုံခံနေရတာကို မကျေနပ်တဲ့ သူတွေရောပေါ့။ ပြည်ပကလည်း ဖြစ်မှလုပ်ပေးတာထက်စာရင် အခုတည်းကစုစည်းပြီး ချက်ချင်းSupport လုပ်ပေးနိုင်ဖို့ ပြင်ဆင်ပေးထားစေချင်တယ်။ နောက်တစ်ပတ်မှ ကျတော်ဆက်ပို့ပေးပါမယ်။ အဆင်ပြေရင်ဓာတ်ပုံတွေပါ ထည့်ပေးလိုက်မယ်။....

ဒါကတော့ ပြည်တွင်းက ပေးပို့လာတဲ့ စာပါ။

နောက်တခုကတော့ မြန်မာပြည်က ဂျပန်ကို ရောက်လာတာ မကြာသေးတဲ့ ကိုစံရွှေမြင့်က အမျိုးသားဒီမိုကရေစီအဖွဲ့ချုပ်နဲ့ အဖွဲ့ချုပ်ဝင်တွေရဲ့ သတ္တိကိုပြည်သူတွေက လေးစားကြတဲ့ အကြောင်း ကိုမြန်မာပြည်မှာ သူမြင်တွေ့ကြားသိခဲ့ရတဲ့ အကြောင်းကို ပြောပြသွားပါတယ်။ ကျတော် ဒေါ်အောင်ဆန်းစုကြည်နဲ့ အဖွဲ့ချုပ်ကို ထောက်ခံအားပေးတဲ့ သူတယောက်ပါ။ အခုအဖွဲ့ချုပ် ဖွင့်ထားတဲ့ ရုံးခန်းဟာ ပထမကတော့ အိမ်ပိုင်ရှင် အဘိုးကြီးက ငှားထားတာပါ။ နောက်အဖိုးကြီးက ဒေါ်အောင်ဆန်းစုကြည်ကို လေးစားတဲ့ အတွက် အဖွဲ့ချုပ်ရှိနေတရွေ့ အသုံးပြုနိုင်ဖို့ တခြမ်းကို အခကြေးငွေ မယူပဲ ပေးလိုက်တယ်လို့သိရပါတယ်။ စစ်အစိုးရက အိမ်ပိုင်ရှင် ကိုအမျိုးမျိုး ဖိအားတွေပေး နှင်ထုတ်ခိုင်းပေမယ့် အိမ်ပိုင်ရှင်က လက်မခံခဲ့ပါဘူး။ အိမ်ပိုင်ရှင် အဘိုးကြီးဆုံးတော့ ဒေါ်အောင်ဆန်းစုကြည် ကိုယ်တိုင်လာရောက်ခဲ့ပါတယ်။ စစ်အစိုးရက အိမ်ပိုင်ရှင် တွေကို အငြိုးအတေးကြီးစွာနဲ့ နိုင်ငံခြားသွားခွင့် ပိတ်ထားပါတယ်။ သူတို့က ဘိလပ်မြေရောင်းဝယ်ရေး လုပ်တယ်လေ။ ငွေကြေးအတန်အသင့်ရှိပေမယ့် အိမ်ပိုင်ရှင်ရဲ့ မိန်းမနဲ့ မြေးတွေကို အခုထိ နိုင်ငံခြားသွားခွင့် ပိတ်ထားပါတယ်။ အခုထိ ပတ်စ်ပို့မထုတ်ပေးဘူးလေ။

အဖွဲ့ချုပ်ရှေ့က လ္ဘက်ရည်ဆိုင်၊ ထမင်းဆိုင်၊ ကားလေထိုးကျွတ်ဖာဆိုင်တွေက ထောက်လှမ်းရေး တွေဖွင့်ထားတာ။ အဲ့ဒီကနေပြီး သူတို့က အဖွဲ့ချုပ်အခမ်းအနား နေ့တွေဆိုရင် ဗီဒီယိုရိုက်၊ ဓာတ်ပုံရိုက်တွေ လုပ်တာပေါ့။ အခမ်းအနားနေ့တွေ ဆိုရင် ကြံ့ဖွတ်စွမ်းအားရှင်တွေရဲ့ ဆိုင်ကယ်တွေ ဒိုင်နာကားတွေ အပြည့်ရှိတယ်။ စွမ်းအားရှင်တွေ ပါတဲ့ကားတွေက အဖွဲ့ချုပ် အခမ်းအနားရှိရင် အနည်းဆုံး မရှိဘူးဆိုရင် ၆စီးရှိတယ်။ ဒီကောင်တွေ အတွက ထမင်း၊ဒါန်ပေါက်၊ လ္ဘက်ရည်၊ အအေးအစုံလုပ်ပေးတယ်လေ။ ဒီကောင်တွေ အလုပ်က အားရင် ခြင်လုံးခတ်တယ်၊ ကားပေါ်မှာ ဖဲရိုက်တယ်၊ အံစာခေါက်တယ်၊ ဒိုးဇာတ်ကစားတယ်။ ဒီကောင်တွေကို ဘေးမဲ့ ပေးထားတာလေ။ အဖွဲ့ချုပ်က လူငယ်တွေ လ္ဘက်ရည်ဆိုင် ထိုင်တာတို့ ဈေးဝယ်တာတို့ ဆိုရင်ဒီကောင်တွေ အနည်းဆုံး လေး၊ငါးယောက် အမြဲနောက်ကလိုက်တယ်လေ။

ဒီလိုအနှောင့်အယှက်တွေ ရှိပေမယ့်.. အဖွဲ့ချုပ်ဝင်တွေ အဖွဲ့ချုပ်လူငယ်တွေရဲ့ မျက်နှာမှာတော့ စိတ်ပျက်တဲ့ပုံလုံးဝ မရှိဘူး။ ယုံကြည်ချက်အတွက် သတ္တိရှိရှိနဲ့ လုပ်ကိုင်နေတာ တွေ့ရပါတယ်။ ယှဉ်ကြည့်လိုက်ရင် အကိုရာ မျက်နှာတွေ စိတ်ဓာတ်တွေက ဆန့်ကျင်ဘက်ပဲ ကျတော်က နေ့စဉ်မြင်တွေ့နေရတာလေ။ ဓမ္မနဲ့ အဓမ္မရိုးရိုးလေး အားပြိုင်နေတာလို့ ကျတော်ခံစားမိတယ်။ ပြည်သူတွေရဲ့ စိတ်ထမှာတော့ NLD ဟာသူတို့အတွက် ဒီနေ့အထိ အားကိုးအားထား နေတယ်ဆိုတာ ကျတော်မြန်မာပြည်က ရောက်တာ မကြာသေးတဲ့ သူတယောက်အနေနဲ့ ရဲရဲကြီး ပြောရဲပါတယ်ဟု အဖွဲ့ချုပ်ကို ထောက်ခံအားပေးတဲ့ ကိုစံရွှေမြင့်က သူသိသမျှပြောဆိုသွားပါတယ်။