ကချင်ဒေသတွင်ဖြစ်ပွားနေသော စစ်ပွဲများကို ရပ်ဆိုင်းပေးရန် ဂျပန်နိုင်ငံရောက် ကချင်တိုင်းရင်းသားများ၏ တောင်းဆိုဆန္ဒပြပွဲ အခမ်းအနား (သတင်း၊ ဓာတ်ပုံ)
ကချင်ဒေသတွင် ဖြစ်ပွားနေသော စစ်ပွဲများကို ရပ်ဆိုင်းပေးရန် ဂျပန်ရောက်
ကချင်တိုင်းရင်းသားများ တောင်းဆို
တိုကျို၊ ဇွန်(၂၄)သတင်း။....။ သန့်မျိုးထွေး
ယခုလ(၉)ရက်နေ့မှစ၍ မြန်မာအစိုးရစစ်တပ်များနှင့် ကချင်လွတ်မြောက်ရေးတပ်မတော်(KIA)တို့အကြား ဖြစ်ပွားနေသော စစ်ပွဲများကို ရပ်ဆိုင်းပေးရန် ဂျပန်နိုင်ငံရောက် ကချင်တိုင်းရင်းသားများ စုပေါင်း၍ တိုကျိုရှိ မြန်မာအစိုးရသံရုံးရှေ့တွင် ယနေ့နေ့လယ်ပိုင်းက သွားရောက်ဆန္ဒပြ တောင်းဆိုခဲ့ကြသည်။
အစိုးရစစ်တပ်၏ ထိုးစစ်ဆင်မှုများကြောင့် ကချင်ပြည်နယ်အတွင်း မတည်ငြိမ်မှုများ တနေ့တခြား တိုးတက်များပြားလာပြီး စစ်ကိုကြောက်ရွံ့၍ တရုတ်ပြည်နှင့် လိုင်ဇာမြို့ဖက်သို့ ထွက်ပြေး တိမ်းရှောင်လာသူ တသောင်းကျော်ရှိသွားပြီး စစ်တပ်အချင်းချင်း တိုက်ခိုက်နေရုံမျှမကဘဲ အပြစ်မဲ့ ကချင်လူထုကိုပါ ညှင်းပန်းနှိပ်မှုများ ထင်ထင်ရှားရှား ရှိလာသည့်အတွက် ထိုးစစ်များကို ရပ်ဆိုင်းပေးရန် တောင်းဆိုခြင်းဖြစ်ကြောင်း ကချင်အမျိုးသားအစည်းအရုံး(KNO-Japan)၏ ဥက္ကဋ္ဌ ဦးပီတာဘရန်ဆိုင်းက ပြောသည်။
၎င်းက ``တိုင်းရင်းသားအားလုံးအရေး၊ လူ့အခွင့်အရေး၊ အပစ်အခတ်ရပ်ဆဲရေး၊ သုံးပွင့်ဆိုင် တွေ့ဆုံ ဆွေးနွေးရေးဆိုတာတွေကို ကျနော်တို့ တောင်းဆိုထားတယ်၊ ကချင်နဲ့(၁၇)နှစ်တိုင် အပစ်အခတ် ရပ်ဆဲထားတယ်။ ဒါဟာ ကျနော်တို့ ကချင်တွေအနေနဲ့ စစ်ကိုမလိုလားလို့ စားပွဲဝိုင်းပေါ်မှာ အားလုံးပါဝင်တဲ့တွေ့ဆုံဆွေးနွေးရေးကို လုပ်ချင်လို့ပဲဖြစ်တယ်။ ဒါပေမယ့် အခု နောက်ဆုံးမှာ ဘာမှအကျိုးမှရှိမလာဘဲ တိုက်ပွဲတွေကို ပြန်စခဲ့ရတယ်။ ကျနော်တို့ တိုင်းရင်းသားတွေဖက်က စစ်ကို ခုခံကာကွယ်တဲ့ အနေနဲ့ဘဲ ပါဝင်နေရတဲ့ အနေအထားမှာရှိပါတယ်´´ဟု ရှင်းပြသည်။ ကချင်တပ်မတော်အနေနှင့် နအဖ၏ အခြေခံဥပဒေပါ အချက်များအတိုင်း နယ်ခြားစောင့်တပ် အသွင်ပြောင်းရေးကို လက်ခံလိုက်မည်ဆိုပါက ကချင်တိုင်ရင်းသားတို့၏ လွတ်လပ်ခွင့်များ ထာဝရဆုံးရှုံးသွားနိုင်ပြီး ကချင်ဆိုသည့်အမည်ပင် ပျောက်သွားနိုင်သည့်အတွက် လက်နက်ကိုင်လမ်းစဉ်ကို ဆက်လက် လျှောက်လှမ်း နေရခြင်းဖြစ်ကြောင်း စစ်ပွဲများကို ရပ်ဆိုင်း၍ အပစ်အခတ်ရပ်ဆဲရန် ၎င်းတို့ဖက်မှ တရားဝင် ထုတ်ပြန်ကြေငြာထားပြီး အစိုးရစစ်တပ်များ၏ ထိုးစစ်များကြောင့် စစ်ဘေးရှောင် ဒုက္ခသည်များ ပိုမိုများပြား လာနေသည့်အတွက် စစ်ရပ်ဆိုင်းရန်နှင့် ဒုက္ခသည်အရေးကို ကူညီဆောင်ရွက်ပေးရန်အတွက် ကုလသမဂ္ဂ၏ ကြားဝင်ဆောင်ရွက်ပေးမှုကို လိုလားကြောင်းလည်း ပြောပြသွားသည်။
တောင်းဆိုဆန္ဒပြပွဲကို မြန်မာ့ဒီမိုကရေစီကွန်ယက်၏ ကူညီပံပိုးမှုဖြင့် ကျင်းပကြခြင်းဖြစ်ပြီး ဂျပန်ရောက် တိုင်းရင်းသားပေါင်းစုံနှင့် စစ်ဆန့်ကျင်သူ မြန်မာနိုင်ငံသားများလည်း ပူးပေါင်းပါဝင်ခဲ့ပြီး အင်အား(၁၅၀)ခန့်က အပစ်အခတ်ရပ်ဆဲရေးကို ဂျပန်၊ မြန်မာနှစ်ဘာသာဖြင့် ဟစ်ကြွေးတောင်းဆိုကြကာ စစ်ရပ်ဆိုင်းပေးရန်၊ တွေ့ဆုံဆွေးနွေးရေးကို အမြန်ဆုံးပြုလုပ်ပေးရန် စသည့်တောင်းဆိုချက်များပါဝင်သည့် တောင်းဆိုစာတစောင်ကို မြန်မာသံရုံးသို့ပေးအပ်ခဲ့သည်။
အခမ်းအနားမှူးအဖြစ် ဆောင်ရွက်ခဲ့သည့် အမျိုးသားဒီမိုကရေစီတပ်ပေါင်းစု၏ ဂျပန်ကိုယ်စားလှယ် ကိုမိုင်ကျော်ဦးက``ဒီစစ်ပွဲကို အမြန်ရပ်ဆိုင်းစေချင်တယ်။ ဒီစစ်ပွဲကြောင့် ကျနော်တို့တိုင်းရင်းသားတွေ ပြည်ထောင်စုဖွားတွေကြားမှာ မယုံကြည်မှုတွေ၊ ပဋိပက္ခတွေကို ပိုဖြစ်စေတယ်။ တွေ့ဆုံ ဆွေးနွေးရေးကလည်း ဘာလို့မဖြစ်သေးတာလဲဆိုတော့ မယုံကြည်ကြသေးလို့။ ကျနော်တို့ တိုင်းရင်းသားတွေ တဖက်မှာ ခုခံစစ်တွေဆင်နွှဲရင်း တွေ့ဆုံဆွေးနွေးရေးကို မျှော်လင့်နေပါတယ်´´လို့ ပြောပြသွားသည်။
ဆက်လက်၍ လာမည့်ရက်များအတွင်း တိုကျိုရှိ ကုလသမဂ္ဂတက္ကသိုလ်အဆောက်အဦးရှေ့တွင် သွားရောက် တောင်းဆိုရန် ဆန္ဒဖော်ထုတ်ရန်နှင့် မြန်မာအစိုးရအပေါ် တစုံတရာသော အတိုင်းအတာဖြင့် သြဇာသက်ရောက်မှုရှိသော ဂျပန်အစိုးရအနေနှင့်လည်း စစ်ရန်ဆိုင်းပေးရန် ဖိအားပေးမှုများ ပြုလုပ်ပေးရေးအတွက် ဂျပန်နိုင်ငံခြားရေးဝန်ကြီးဋ္ဌာန ရုံးရှေ့တွင်လည်း သွားရောက်တောင်းဆို ဆန္ဒထုတ်ဖော်ရန် အစီအစဉ်များရှိကြောင်း သိရပါသည်။
သတင်းရေးသားသူ-သန့်မျိုးထွေး
