သခင်အားရ ကျွန်ပါးဝ နအဖ သံရုံးဝန်ထမ်း၏ မိုက်ရိုင်းစော်ကားချက်...

ဒေါ်အောင်ဆန်းစုကြည်ပုံအား ခြေထောက်ဖြင့် ကန်နေသည့် စစ်သံရုံးဝန်ထမ်း၏ စော်ကားမှု

ဇွန်လ(၁၈)ရက်နေ့က လူထုခေါင်းဆောင် ဒေါ်အောင်ဆန်းစုကြည်၏ မွေးနေ့ပွဲအခမ်းအနားကို နယူးယောက်မြို့ မြန်မာစစ်ကောင်စစ်ဝန်ရုံးရှေ့မှာ ကျင်းပပြုလုပ်ပါတယ်... (အခမ်းအနားအစီအစဉ်အတိုင်း မြန်မာစစ်သံရုံးရှေ့တွင် စုဝေးကြပြီး သံရုံးတံခါးဝနှင့် ခြံဝင်းရှေ့တွင် ပန်းစည်းအ၀ါများ တဦးချင်း တန်းစီကာ အမှတ်တရ နေရာချကြသည်ကို တွေ့ရသည်။ ထိုအချိန်တွင် သံရုံးဝန်ထမ်းတဦးက အပြင်သို့ ထွက်ရှိလာပြီး မွေးနေ့အခမ်းအနား ဆောင်ရွက်နေသူများကို အသံကျယ်လောင်စွာ ဟိန်းဟောက်ပြောဆိုခြင်း၊ တားမြစ်ခြင်း၊ ရုန့်ရင်းကြမ်းတမ်းသော စကားများ သုံးစွဲသည်ဟု ကြားသိရသည်။ ၎င်းနောက် သံရုံးအတွင်းသို့ ပြန်လည်ဝင်ရောက်သွားရာ လမ်းပေါ်တွင် စီစဉ်ထားသော ဒေါ်အောင်ဆန်းစုကြည် ဓာတ်ပုံများနှင့် ပန်းစည်းများကို ခြေထောက်ဖြင့် ကန်ထုတ်လိုက်သည် ဟု မျက်မြင်တို့က ပြော၏။) (မိုးမခသတင်းဋ္ဌာနပါ သတင်းပါ)

နအဖစစ်သံရုံးမှ သရုံးဝန်ထမ်းရဲ့ စော်ကားချက်ကတော့ မြင်တဲ့အတိုင်းပါပဲ။ ပြည်တွင်းမှာ ထင်သလို မောက်မာ စော်ကား ရိုင်းစိုင်းရုံတင်မကပဲ ပြည်ပမှာပါ ထပ်မံစော်ကားခြင်း ဖြစ်ပါတယ်။ ငြိမ်းငြိမ်းချမ်းချမ်းနဲ့ လုပ်နေတဲ့ပွဲပါ။ ဓာတ်ပုံနဲ့မွေးနေ့ပန်းစည်း ချနေတာပါ။ လူမြင်ကွင်းရှေ့ နိုင်ငံခြားသားတွေရှေ့မှာ တမင်သက်သက် စော်ကားပြလိုက်တာပါပဲ။ မိမိလုပ်ရပ် ဘယ်လောက် အောက်တန်းကျတယ် ဆိုတာပြလိုက်ပြီး ဒီမိုကရေစီ အင်အားစုတွေကို ပြောင်စိန်ခေါ်လိုက်တဲ့ လုပ်ရပ်လို့ မြင်ပါတယ်။ ပြည်တွင်းက အာဏာရှင်ဆန်ဆန် လက်ရဲဇာတ်ရဲ ဥပဒေမဲ့ လုပ်ရပ်တွေက ပြည်ပထိပါလာတာပါ။ ဒီလုပ်ရပ်ကို အမေရိကမှာ နေထိုင်သူများနဲ့ ကမ္ဘာ့နိုင်ငံအသီးသီးမှ မြန်မာ့ဒီမိုကရေစီ အင်အားစုတွေက ကန့်ကွက် ရှုတ်ချသင့်ပါတယ်။ နို့မဟုတ်ရင် ပြည်ပမှာပါ စော်ကားမှုတွေ မိုက်ရိုင်းမှုတွေ ပိုမိုပြီး လုပ်ဆောင်လာပါလိမ့်မယ်။ သခင်အားရ ကျွန်ပါးဝအောင် လုပ်တဲ့ လုပ်ရပ်အနေနဲ့ အပြင်းအထန် ကန့်ကွက်ပါတယ်။